身在上海拍緊內地電影《第601個電話》嘅張栢芝噚日26歲生日，雖然佢要喺片場開工度過，仲着低胸裙拍攝唱歌鏡頭，可能因為連日趕戲嘅緣故，搞到雙眼紅筋滿布，但佢依然頂硬上，唔怪得之大隊都錫晒佢，特別為佢舉行神秘生日會。
猛sell《周璇》
紅眼栢芝雖然唔多舒服，不過大隊突然開P，同片演出嘅超級女聲周筆暢仲特別送咗條Tiffany頸鏈畀佢做生日禮物，所以栢芝今年即使冇仔喺身邊賀壽，依然笑到見牙唔見眼，仲話今次係佢最難忘嘅生日會㖭。
栢芝接受傳媒訪問時，唔提新戲反而不停硬銷佢主演嘅電視劇《周璇》，佢猛話接演呢部電視劇後，發現自己同周璇喺生活、工作、家庭、感情方面都好相似，同對方真係超有緣咁話，佢話可能喺好多年後會有人開拍《張栢芝》電視劇。但如果事成嘅話，咪要搵埋謝霆鋒、陳曉東、陳冠希等等角色，選角都好頭痛啫！
