香港eBay前幾日正式推出網上商店，仲要係免費，真係有咁大隻蛤乸隨街跳？免費畀個網站你用，話都冇咁易，但做生意又點止間舖咁簡單，仲要收錢、做宣傳……計華華話，eBay呢招叫做拋磚引玉，最怕你唔喺佢度開舖，開咗嘅話，先慢慢推介其他收費服務，呢啲錢先長收長有！
呢個「eBay商店」功能，其實喺美國一早就有，全球已經有48萬6千間舖，當中一半以上喺美國，呢個新功能，今個月17號正式引入香港，除咗用免費做餌，仲出動獨立網址，再搵埋潮流歌星陳冠希創辦嘅ClotInc.做佢哋第一個客，咁就唔怕你唔知啦。華華上網試過，都算簡單，就算唔係太識用電腦都應該搞得點，有興趣賣嘢，但又冇乜資金嘅，不妨諗吓。