特區政府唔聲唔聲，收到成140億盈餘，之後竟然可以扮冇嘢，唔肯向市民進行任何回饋，真係激到一眾納稅人火滾。立法會各大黨派今次都不分政見，全力向140億盈餘進發，務求政府回少少水都好過冇，所以今日由工聯會鄺志堅大狀提出嘅還富於民動議辯論，六位不分黨派系議員，包括田少、單雞單仲偕、陳鑑林、張超雄、馮檢基同梁耀忠都提出修訂，都算係近期最熱鬧嘅動議辯論。
提出原動議嘅鄺大狀開宗明義，話自己提出呢個辯論，都係想集各黨派之力，迫政府做少少嘢，等納稅人可以順氣啲啫。佢最初入紙話要提動議辯論時，其實係想提勞工問題；忽然整單政府涉嫌講大話，盈餘多近成百四億嘅嘢出嚟，自己梗係食住timing，將題目改為迫政府還富於民；唔利用咁好機會，仲等幾時？唔通想錯失良機咩！
「免一季差餉」呼聲高
雖然政府早前已經話明冇回饋空間，但鄺大狀唔係咁睇，佢覺得負責頂替唐唐答辯嘅肥馬局長，一定有嘢講，事關個盈餘同當初估計真係相差太多，政府唔回應，好難面對鄉親父老啫，自己就最希望當局喺青少年就業度加碼，等啲口靚仔口靚妹好過啲。
不過，喺特區大玩親疏有別下，鄺大狀認為民建聯最終極有機會隨時跑出，即係政府有機會接納陳鑑林佢哋嘅建議，免市民一季差餉喎，鄺大狀仲笑笑口話佢哋到時就可以喺立法會即時拉banner話成功爭取，喺公眾面前攞分。
同樣有提出修訂嘅民主黨單雞都話，冇信心政府會接納佢哋要求回復薪俸稅去02/03年度水平嘅建議，反而都覺得政府隨時向民建聯送大禮，事關佢哋係親密夥伴，明益佢哋都不足為奇，自己個黨被標籤為反對派，當然唔恨得咁多，惟有繼續表達意願囉。
唐唐外訪唔會派糖？
八方聽聞，政府真係冇乜放寬空間，尤其唐唐唔喺香港去咗外訪，如果有喜訊公布，要攞分，都唔會揀自己唔可以現身嘅時候啦，咁咪即係為他人作嫁衣裳，畀晒煲呔攞分啫。所以民建聯好咁開心住，今日吹完一輪水，肥馬局長都未必會有喜訊公布，但係佢一定會乘機解釋吓政府嘅難處，盤數成四千幾億咁龐大，點可能連兩個百分點嘅誤差都唔能夠容忍？
爆料熱線：29290000、27860099
報料傳真：26239278
報料電郵：[email protected]