港股非常反覆，下晝3點前恒指最低，跌114點。3點過後，歐洲開市，原來止跌回升，港股跟埋上去，埋單有59點進賬。
又驚又貪，係炒家嘅心態。揸貨，驚個市再踩多幾腳落去，恒指如再散200點，揸着槓桿率大嘅C輪，可以即輸3成。唔入市，又怕個市有技術反彈，執輸咗，貪念起，又再上車。
期指升幅較恒指升幅大92點，短期個市有機會好多些少，但大反覆難免，落場，最好都係怡情注碼，以免成日搽白花油。
中銀C輪3641：中銀C輪9068，反映晒炒家患得患失，又驚又貪嘅心態。下晝2點45分，恒指散過百點，中銀（2388）成14.90元（跌0.45元），9068低見30.5仙。去到尾，中銀收15.25元（仍跌0.10元），隻輪彈上49.5仙，個幾鐘頭低位起計急升62%。中銀母公司中行（3988）招股，鼓響鑼鳴大大聲，中銀跌後估計升番啲。低位買C輪，應該諗隻3641。
新世界C輪9197：新世界（017）跌0.45元，收12.50元，有兩個月未見過如此低位。博反彈，買輪揀9197，12月中到期，輪價36.5仙，溢價1.4%，槓桿率3.4倍（有效3.1倍），引伸波幅39%。數據唔算特別靚，但靚過其他新世界C輪。
章盛