樓價近兩年大升，升幅勁過租金，加上利率喺過去一年係咁加，供樓負擔逐步超越租金，供平過租幾乎成為絕響，除咗個別樓價100萬以下嘅細價樓，偶然有一兩宗之外，大型屋苑更近乎絕迹。
不過，中價樓鰂魚涌康怡花園，最近就有一宗呢類成交，中原康怡分行經理楊文傑話，要有好多嘢配合先至會供平過租，個案特殊，唔可以一概而論。佢話，有個租開康怡花園兩房單位嘅租客，近期租約期滿，原本諗住繼續租樓，不過發現市場有個筍盤放緊，計過數之後，竟然供平過租，於是決定入市做業主。
佢買入嘅D座中層11室，624呎，成交價240萬，呎價3846，低市價近一成，以七成按揭，25年還款計，月供約1萬蚊，相對佢之前每月以1.1萬租個同樣兩房單位，每個月慳番成千蚊。
楊文傑話，康怡嘅租金喺今年升咗兩、三成，逐步追番樓價嘅升幅，𠵱家600幾呎兩房單位，月租過萬，撞啱有個呎價低過4000蚊嘅筍盤，就會出現供樓抵過交租嘅情況。