港股大幅波動，心大心細嘅業主，好多都急急減價出貨，本報日前報道沙田第一城51座有個395呎單位嘅業主，將叫價由138萬降低至125萬求售，減幅近一成。噚日蘭西收到同座業主來電，話自己放緊嘅單位，畀買家壓價，要求減價一成。
呢個業主話佢個單位喺中高層，放盤叫125萬，若真係要減一成，賣出就只係收得番一百一十幾萬。佢認為大家放嘅價錢唔同，冇理由要同樣減咁多。
蘭西覺得，嗰個肯減價約10%嘅一城業主，可能有自己嘅原因先至咁做，其他業主係咪要跟，可以睇番自己嘅情況，同埋查吓啲成交紀錄做參考，再作決定都未遲。
其實呢排個市咁靜，代理梗係乜嘢方法都用齊，游說買賣雙方，以求做成交易，所以業主都要計埋呢個因素至得。
不過，蘭西都畀個最新成交大家做參考，係世21奇豐促成嘅44座高層F室，面積395方呎，成交價112萬，呎價2835蚊。