喺舊年加息周期開始前買咗樓嘅用家，好似屯門海典軒1座高層E室個業主，祥益盤嘉茵話，呢位業主舊年中以177萬元買入想換樓，但係過咗年個市都冇咩起色，自己同區住緊層樓又未賣出，喺睇唔清前景嘅情況下，揸住兩層樓風險太大，心諗新樓個價可以硬淨啲，於是乎上個月諗住蝕少少，以175萬放售海典軒層樓。
今個月初個個都話黃金周香港實有運行，加上發展商一招高價開盤仍然賣得，一時心雄將放盤價反上去185萬元，賺些少幫補使費都好。點知幾日後，地產商劈價賣貨尾，搶完客仲要累街坊，連個樓市都劈低埋，海典軒個業主知道呢鋪\大鑊，惟有急急降價，終於減到163萬先有人接貨，連埋使費唔見成20萬元，好多打工仔成年人工都冇咁多。
樓市同股市一樣，旺市時一街都係股聖樓神，淡市下乜聖乜神都落得倒瀉籮蟹，反覆市仲死，唔知升定跌之下，班專業炒家都隨時領嘢，一般小市民，或者人炒佢炒嘅跟風客，就更加會搞到進退失據。呢排連幾乎冇晒牙嘅阿婆都話，抽中行股票可以長揸必賺，股市前景同樓市嘅前景有幾好，相信都唔使畫公仔畫出腸。
電郵地址：[email protected]