雖然大市止跌回升，恒指升59點，但早前的當炒股繼續表現肉酸，好似華基光電（155）昨日股價一度跌逾4成，收報0.46元，雖然跌幅收窄至17.86％，但所有技術支持位都穿晒，睇怕都係芬佬埋單計數離場。
至於中國水務（855），在公布新投資後，股價一度有起色，升至1.96元，但收市升幅收窄，得番1.79元，升2.87％。
雖然後市方向未明，但有嘢始終要做，最近又有證券行唱好濠賭股，摩根大通昨日出報告，話睇好銀河娛樂（027），將目標價定到9.10元咁高，可惜銀娛股價未受刺激，平收6.40元。據講摩通稍後會帶證券界過去澳門考察喎。
查實濠賭股呢排好消息多，除咗銀娛有新賭場開幕外，另外兩隻濠賭股信德（242）同埋新濠（200），喺呢個月尾納入摩根士丹利資本國際指數，但可惜股價冇大驚喜，可能要等下一個浪。
慕容小初