自從曾特首拍晒枱咁質問班賓卡「Wherewereyouguys?」之後，唔少賓卡都開始有動作，嚟緊最大壇嘅，應該係由任總做頭，帶一眾賓卡上京探路。華華噚日見到花旗TC陳子政，問佢會唔會跟團北上，佢雖則冇正面回應，但就話世界盃開鑼前後，都會喺北京，唔知咁算唔算畀咗答案大家呢？
話自己WorkHard兼WorkSmart嘅TC，除做嘢之外，又會摸黑起身睇波，前排就睇歐冠，4年一度嘅世界盃，佢又點會錯過。佢話雖則嗰陣身在北京，但都會睇波。咁邊隊有冠軍相呢？TC話自己鍾意好幾隊，但講到冠軍，就應該不出巴西同德國！
鍾意睇波之外，陳子政應該都幾鍾意年輕人，事關佢每次同後生仔演講，都會講到過晒鐘，停唔到口，前一排同大學生分享打工心得如是，噚日同百幾個十零歲中學生講理財，情況都一樣。唔似得同傳媒講嘢咁，次次都話「講兩句好啦，趕住走呀！」
大客入錢落佢袋
TC講理財，雖則都係叫大家量入為出，唔好亂借錢，但轉頭就話「99%嘅人都貪錢」，跟手又講「節儉係好，但唔好太刻薄自己」，皆因錢只係得一個用途，就係「用」囉！佢仲同班學生講，自己喺個好出名嘅大客度，學識「君子好財，取之有道」，至於個大客係邊個？佢就死都唔肯講。
李華華
讀者如有任何意見或報料，歡迎發送電郵至[email protected]。