記唔記得華華上個禮拜講過，中華電力常務董事阮蘇少湄（圖），噚日會去將軍澳迦密主恩中學，同啲同學仔分享經驗。席間有同學仔問阮太，事業上，做到中電百年以來首位女常務董事，又有個好老公，兩個寶貝女，到底仲有冇乜嘢遺憾呢？
阮太答，其實都有諗過呢個問題，佢話今時今日有咁嘅成就及幸福家庭，真係好感謝上天嘅眷顧。有人問過佢，只有兩個女而冇仔會唔會覺得爭咁啲嘢？佢話一啲都冇咁嘅感覺，因為佢真係好鍾意兩個女。啲母愛直情標晒出嚟！
阮太仲話，其實一路都覺得自己性格似男人多過女人，所以，完全唔覺得喺男性主導嘅電力行業中打滾有乜嘢特別問題。有時開會開到天昏地暗，真係要到去廁所嗰一刻，先記得自己係女人！