噚日，孫柏文喺《金手指》一欄裏面，廣發英雄帖，叫大家畀啲評語噚日有份試寫《金手指》財經評語嘅同事。今日，我睇完大家畀嘅評語之後，第一個反應就係，我有少少感受到當年毛主席叫人百花齊放咁去批評共產黨嘅感受。哈、哈！
最大批評，就係話我過去呢個禮拜講少咗個市，所以當我冇帶雨傘等巴士，經過喺毛毛細雨下自我反省，一路睇住叠全球主要股票市場指數圖表，同埋叠金、銀、銅、石油商品價格走勢圖表嘅情況下，決定今日講番個市。
今日，我想同大家用技術分析去睇睇未來股市走勢。大家都知道，我一向以來都非常鄙視純粹用技術分析，去預測股市走勢，因為長遠來講基本分析先至準確。不過，我亦相信經過基本分析之後，技術分析係可以提供入市同出市訊號。
個個濫發鈔票
大家都知，孫柏文深信不疑，嚟緊10年大勢都係原產商品嘅升幅多過股票。甚至可以話，原產商品價格一定升，股票就不單止冇得升，仲分分鐘跌。
咁主宰價格升幅，就一定係世界各國嘅中央銀行。因為我哋今時今日生活在中央銀行濫發鈔票嘅周期，所以可以見到佢哋個個喺度濫發鈔票，不過，濫發嘅速度會主宰價格升幅及跌幅。喺呢個周期裏，濫發鈔票速度快嘅時候，原產商品價格就會狂升；濫發鈔票速度收慢，原產商品價格就會升慢啲。相對嚟講，濫發鈔票速度快時，股票價格就會升；濫發鈔票速度收慢，股票價格就會跌。當然，股票價格不單止會反映今日的現實，仲會反映市場覺得它朝會發生嘅事情，所以，股票價格下跌，唔需要中央銀行今日收慢濫發鈔票嘅速度，只要市場覺得佢哋會收慢，個股市就會大跌。
係咪個別例子
自從日本央行喺幾個禮拜前，話到明會收慢濫發鈔票速度之後，大家都喺度估，世界股市大勢幾時會由2003年開始嘅升市變跌市。呢個問題最好就問吓最科學嘅走勢分析朋友，200日平均線。一兩個市場跌穿200日平均線，可能係個別例子，不過正當大批股市指數跌穿200日平均線時，就係一個大趨勢。仲有，單憑睇恒生指數走勢圖，差唔多日日開市都有因外圍股市高開或低開，世界大勢係點，特區股市就會點。所以由今日開始，孫柏文會用隻金手指，幫大家耐唔耐篤個叫做「世界股市死得未？」嘅表出嚟，畀大家參考。聽日再同大家講原產商品價格。
孫柏文