港股噚日大跌507點，阿虎屈指一算，港股兩個星期多啲，恒指已由高位17328大跌1523點，跌勢咁急真係見者心寒。無論早前股民對認購中行（3988）如何有信心，現在都難免打個冷震，市傳有孖展客要求抽飛，及配售部份的篤手指大戶開始縮手指，另外更傳到暗盤價只是3元，僅是招股價的上限。若果中行最終以每股2.50元定價，暗盤賣方仲有20%賺，仍然和味，但真金白銀的認購者就弊家伙，因為中行若以2.50元下限定價，6月1日上市時，好大機會破底收場。
銀行削冠君孖展額
i師傅話，中行的認購應該唔差，因至今仍未見銀行主動削減認購中行股份的孖展額。不過，一旦銀行見到整體認購情況不妙，但仍有經紀行或大戶唔識死，大手入借孖展入票，銀行為求自保就會主動削孖展額，寧願有錢唔賺，都唔想見到有孖展客百分百中招後走佬，最後搞到銀行變相自己坐盤，或者進行斬倉。周三掛牌的冠君（2778），就出現過有銀行削孖展額情況，由原本肯借90%，但最終削至50%，甚至不借予部份實力較弱的證券行及其客戶。睇嚟冠君首日掛牌唔慌靚，佢阿媽鷹君（041）短期都係不宜沾手。
有傳聞噚日港股的大跌市，是因為大摩從亞太區市場抽走資金往美加。另外，亦有傳聞話有對沖基金睇準中行凍結大量資金之際，狂插港股及期指搵食，之後可能再施回馬槍，炒多轉港股才會真正鳴金收兵，所以個市好快會反彈。不過黑客話，如果對沖基金見有大量散戶入市撈底，唔排除會將大市狠狠踩多腳。
芬佬朋友則話，港股由03年開始回升，由8331升至最近的高位17328，升幅逾倍，股票基金已賺唔少，當然會有基金見好就收，就算連佢自己都打算獲利後將資金投入債券市場，然後放幾個月大假。佢仲話後市有波幅冇升幅，唔會好似早前單邊升市時咁好搵。
阿虎