換一張卡片＋影一張相＋唔答記者任何問題，究竟呢3樣嘢一次過做晒需時幾耐？華華個人認為，頂多都係分半鐘，但對於潤迅通信新管理層，上述3件事做齊似乎好艱難！
噚日一早，賣咗盤畀背景神秘的胡志釗冇耐嘅潤迅開EGM，華華於是冒住大雨，趕到極其吊腳嘅企業廣場，一心諗住問吓胡老闆，千五萬買個殼返嚟會點搞，誰不知等咗一輪之後，公關姐姐話胡生冇份開會，個新公司主席黃生就勁唔得閒，連換張卡片都冇時間咁話。
交涉完一輪，個公司秘書同埋公關先至出嚟話，自己係單位代表，有咩事可以搵佢哋，個爆笑位就響呢度──有人問：你手提幾號？佢答：我未出手提電話……真係好難相信，喺小學生同菲傭都有手機嘅年代，上市公司公關會冇手機？！
胡志釗可能係猛人
講番潤迅，到𠵱家仲未有人真正起到胡生個底，只知佢42歲，有多倫多大學理學士學位，響本地物業市場有逾10年投資經驗，亦有人估佢應該係當年中洲控股（即係𠵱家嘅中科環保）其中一個董事，呢鋪應該係借殼上市再戰江湖咁話，咁好明顯，阿胡生係猛人一個，但食得鹹魚抵得渴，搞得上市公司就預咗見光，總之EGM開到咁唔係叫低調，係鬼祟至真！
讀者如有任何意見或報料，歡迎發送電郵至[email protected]。