回憶總是美好的。87年《街霸》驚為天人，《街霸II》就將格鬥推上巔峯，有邊個未聽過昇龍拳？經歷無數改版，一等數年仍未見3代蹤影，有傳CAPCOM唔敢搞衰正傳，反以前傳形式推出《少年街霸》。結果是成功的，無數嶄新意念令Fans瘋狂投幣，最絕係入兩份錢打1Round嘅「夾擊Boss」秘技，好多機迷擺明被「昆」，都要一嘗呢個2抽1痛毆豪鬼嘅打法！
記者：徐影龍
今年絕對屬「格鬥懷舊年」！繼《拳皇》、《龍虎之拳》、《街霸》等合輯後，終於輪到《街霸Zero》。呢款名為《少年街霸：戰士世紀》嘅全集，收錄全系列共3代《Zero》篇，另加《ZeroIIAlpha》以及Q版化嘅《PocketFighter》。《ZeroIIAlpha》即二代美版，不過首次加入「殺意龍」及改良部份系統，而較特別係《PocketFighter》，在當年算為暴力格鬥界注入清泉。
變態豪鬼戰勝竅門
筆者將合輯5隻Game由頭至尾玩一遍，最欣喜除《PocketFighter》外，各版本均收錄「2抽1模式」（DramaticBattle），即開即玩，毋須如街機般用秘技打出嚟！用咩角色夾擊敵人都得，不過要算超變態嘅豪鬼最有挑戰性；斜波、分身、先讀昇龍勁茅唔在講，一招瞬獄殺更可扣你8成HP！最慘係2人共用一條HP，扣血特快，經驗少啲都隨時被KO。最好玩嘅，係2人有默契地作出夾擊；一個喺遠處出波動拳，一個埋身齋擋，有機會就出超必！又或一左一右夾住豪鬼，猛咁「輕拳連打」，亦可迅速將之打暈，筆者就試過做出39Hit之譜！可惜跟電腦玩夾擊時，其AI實在太低，經常「一尊佛」咁企喺度捱招！
Q版戰士笑爆嘴
筆者到今日先知，《PocketFighter》算係《Zero》系列之一！角色相近但玩法大相逕庭，Q版化人物短手短腳，本應難以打到敵人，不過卻加入如《魔域戰士》般嘅「目押」連技，簡簡單單組合唔同嘅拳腳掣，就可做到威力強勁嘅連招，毋須太複雜地「兜圈出波」，真係小朋友都玩得掂！最搞鬼係拳腳連招成功時，人物會不斷「變裝」，如春麗變交通警、豪鬼變木工佬等，實在惹笑非常！
試玩後評
玩畢整個《Zero》全集，筆者恍如進入時光隧道般，重溫每一代苦練連技之回憶，可恨是筆者「年紀大、手掣壞」，以PS2手掣玩點都唔夠得心應手，但又唔捨得再買JoyStick，相信打後都唔會翻煲晒咁多人物嘅爆機喇。最值得讚唔係1碟5Game咁抵玩，而係其讀碟速度；一開Game揀完玩邊一代時，只讀幾秒鐘碟，之後全程都唔使等，換人、續關超順暢，簡直如玩緊街機一樣！
PROFILE
遊戲類型：格鬥
對應機種：PS2
遊玩人數：1至2人（支援Online對戰）
開發廠商：CAPCOM
行貨售價：$278
