歷史係會重演嘅！05年10月底，建設銀行（939）上市，之前的大半個月，股市大跌，恒指由當時高位15493跌到14189，跌幅8.42%。
今時今日，中國銀行（3988）嘅上市工作又進行得如火如荼，凍結市場資金以千億元計，股市表現如何？又係大跌。恒指由近期高位17328掉頭急挫，跌到噚日低位15790，跌幅又8.8%。
中行集資規模大過建行好多，個市再跌多啲，唔出奇！
建行上市後，個市就好似裝咗火箭咁，由14200起步，升足半年，去到17328，升幅22%！中行上市後，如果歷史又再重演，恒指今年底唔難上到18900。
噚日個市，直情係恐慌性拋售，恒指收15805，大跌507點，係5年來單日跌得最傷嘅，期指收市前仲係咁插，結果低收15688，大跌561點，大低水117點。
中資股今次冇得獨善其身，跟大隊，跌得仲「金」，H指收6644，大跌398點，跌幅成5.6%，都好耐未見過中資股跌得咁傷。不過，二三線股嘅災情更加慘烈，跌幅十幾二十個巴仙嘅股份，幾隻手嘅手指數唔晒。
大前提係公司冇問題
升市嘅時候，預咗個市日後會跌，跌市時亦一樣要諗番第日個市會升番，正所謂有危先有機，個市跌到咁上下之時，就係低吸博反彈嘅大好機會。恒指由高位回落已經1500點，再跌多兩三日，又或者恒指再跌多二三百點，就要郁手嘞。呢一輪有大行睇淡，佢哋睇恒指都係跌到15500啫。
博反彈，對象好多，以股仔而論，呢一輪跌幅成20%至30%嘅，就可以優先考慮，但大前提係公司冇問題。博股仔反彈，可以喺一兩日內就賺到10%至20%利潤，博得中好和味！
講完細價股，講番隻大價嘢，就係港交所（388）。呢輪股市大跌，港交所亦由高位65.80元大幅回落，噚日低收53元，足足跌咗成20%。不過，大市雖跌，但成交仲好活躍，噚日就成400億元，只要大市冇轉靜，港交所若再跟大市調整，或者落到50元水平，就諗得過。呢隻係大基金股，長線只會買貴，唔會買錯。
郭兆誠