郭晉安前晚喺無綫拍《東方之珠》廠景，劇情講述安仔為咗救佘詩曼而同羅貫峰大打出手，點知拍拍吓，羅貫峰唔小心插中安仔右眼，眼皮損咗兼微絲血管爆裂，仲有血水滲出，保安即時送安仔去將軍澳醫院急症室。
噚晚安仔為《東》劇開廠時，話已經冇乜大礙，佢話：「當時眼前一黑，有血水滲出，去到醫院，醫生話眼角膜同下眼瞼損咗，姑娘同我打咗支破傷風針，點知打針仲痛過俾人插眼，原本醫生開咗三日假畀我，但我見冇乜事咪繼續開工囉！」
獻螢幕初吻
雖然安仔唔肯透露俾邊個整親，但馮仁昭一早估到係羅貫峰，噚日馮仁昭打電話問羅貫峰時，佢話：「整傷安仔又搞到停廠，自己已經好唔好意思，點知安仔叫我放心，話呢啲情況一定有，令我個心更加唔安樂，好在佢冇乜事！」
另外，陳山聰同陳霽平噚日冒雨喺赤柱沙灘拍《東》劇外景，佢哋喺劇中飾演情侶，兩個仲會獻出自己嘅螢幕初吻。
