喺香港搞展覽會並唔容易，好似年底舉行嘅首屆亞洲國際房地產會議及博覽會，主辦單位就因為喺香港難搵場地，所以決定去澳門搞。
其實主辦單位04年時曾經喺內地搞過同類展覽，但後來發覺，到港澳地區搞可能較容易搵到內地單位參展，所以先會改變陣地。
當然，佢哋亦都認為，以家吓澳門嘅地位，亦都適合搞呢類活動。至於呢個展覽會亦會安排內地單位參展，喺會上推出發展項目或地皮招商，到場參觀嘅會有大型發展商代表或投資者，所以並唔係純房產展銷會咁簡單。
香港呢幾年唔少嘢都被澳門比下去，𠵱家連強項之一嘅展覽會，啲客都話要移師澳門，香港政府好應該反省吓至得。