商廈市道似乎仲幾活躍，若果叫價合理，大把人爭住接貨，所以近排仍然有炒家搵食。
好似尖沙嘴東部嘅永安廣場低層08至09室相連單位，面積2318方呎，近日以1330萬易手，呎價約5738元，原本件貨喺舊年10月有人用呎價6600蚊買咗，應該喺今年4月成交，但最後撻定，業主殺定之後，將叫價由每呎6300蚊減到5738蚊，就有人出手接貨，成交期亦都有4個月咁長。
業主雖然減咗價，但因為已經殺定在先，實際只係比最初交易銀碼收少幾個巴仙；至於新買家係區內活躍投資者，即刻將單位喺市場以摸貨方式放盤，聽講叫價去到每方呎6800，真係夠勇。
美聯九龍商業部助理區域經理區詠妍話，永安廣場今年無其他成交個案，上一宗成交喺舊年10月，呎價亦係6800。家吓咁嘅時勢，能否再用呢個價出貨，就要下回分解。
同區嘅康宏廣場，一個中層14室望內園單位，近日亦都有摸貨交易，單位面積2327方呎，呎價大約6800，成交價1582萬。
業主喺今年2月以呎價6500買入，成交期係6月，今次轉手賺約70萬。
電郵地址：[email protected]