特區高官近來流行講四字詞語，例如「強政勵治」、「親疏有別」，最新一句係「量力而為」。不過噚日個股市跌到一仆一碌，冇咗超過五百點，成個中環都係蟹，你仲懶好心咁叫人「量力而為」，分分鐘俾人打都似。
自從二○○六年元旦，特區嘅炒風又吹起。股市一連升咗五個月，金價銀價銅價樣樣升，揸住外滙嘅市民亦人人財息兼收。煲呔雖然冇得炒股炒金，但相信佢一樣咁開心，事關特區嘅智囊認為，只要香港人有得炒，咁就冇人會關心政治；只要打好經濟牌，咁煲呔要連任就坐定粒六。
但係會升嘅嘢，根據地心吸力定律，遲早都會跌番落嚟；而且升得愈高跌得愈快。最近嗰隻乜嘢天津港嚟香港抽水，搞到超額千七倍破晒紀錄，已經似國之將亡。到中國銀行又嚟集資，幾百人未天光衝去銀行排隊攞form，荒死執輸咁，特區高官終於開始有啲憂患意識，紛紛企出嚟潑冷水，叫人「量力而為」。
玄學高人：六月股市凶險
好似上個禮拜阿曾特首上新城財經台接受訪問，有個陳小姐打電話上去問功課，佢就苦口婆心咁勸人量力而為，仲話「個別人士買股票是有一定風險，回報率愈高、風險也愈高。」喂，人家可能係要個冧巴啫，使唔使講咁多嘢呢。真係好嘅唔靈醜嘅靈，烏鴉口。
到噚日，八方喺中環麗嘉酒店見到署理財政司葉澍堃（唐英年去咗新西蘭訪問，由葉局長頂檔），佢幫做股票出身嘅吳老闆旗下雜誌搞嘅活動主禮，講到股市，又忠告小投資者：入市前最緊要做足功課，量力而為。仲一連講咗兩次㖭。鬼唔知咩，跌咗千五點至嚟講？
到夜晚，北角啲街坊請咗主管財經事務嘅肥仔局長馬時亨去新都城演講，佢本來係講乜嘢第十一個五年計劃，但碰正大跌市，點都要應應景，提醒小市民要了解風險、老人家唔好炒輪、認購新股唔一定賺梗；講到尾，又係嗰四個字——量力而為。不過肥局長唔算馬後炮，佢真係喺個市仲㷫烚烚時已經示警，八方都聽過。
有玄學高人話六月股市凶險，信不信由你。如果呢個時候爆發股災，特區人民又試富貴浮雲，咁煲呔唯一嘅政治籌碼——民意——可能會跌咗一截，所以求神拜佛都要等明年選舉完個市至好散啊！
爆料熱線：29290000、27860099
報料傳真：26239278
報料電郵：[email protected]