噚日提過嘅「第一屆資本中國傑出企業成就獎」活動，噚日發展及勞工局局長葉澍堃（圖）做主禮兼頒獎嘉賓。局長上台致辭之時，話自己嘅普通話同廣東話冇乜分別，不過尊重主人家，都係用普通話，至於水準係點？佢講咗一句「百尺光頭」就見真章，講到尾，華華都係鍾意聽佢唱歌多啲。
呢個頒獎禮有成14個獎，擺明分豬肉，但得獎嘅大部份都係業內龍頭企業，諗住點都有啲公司高層到場領獎。點知，真係用放大鏡都搵唔到兩個，聽公關話，風姐珍珠打到去上海及北京等地，搞到天氣唔穩定，好多貴賓落唔切嚟香港攞獎，所以領獎代表嘅名單改完又改咁話！