前晚朋友Mabel嚟我屋企睇《火舞黃沙》，諗住沖杯茶畀佢，點知電熱水煲壞咗，咪用微波爐叮杯水囉，但Mabel喝停：「唔好叮水呀，會爆炸㗎！」
佢話聽網友講，有個男仔用微波爐叮一杯清水，幾分鐘後攞杯水出嚟，啲水唔見氣泡水滾，但放啲茶葉落去搞吓佢，啲水突然間滾起上嚟，水蒸氣衝向佢塊面，搞到成面水泡。咁嚴重！好在Mabel提醒我，否則「花容不保」呀！:-O
第二日，我打電話畀科技大學理學院副院長吳大琪問個究竟。吳教授解釋，要用猛火，同埋啲水要有雜質，先煲到啲水沸騰同湧起水泡。但微波爐叮水，好似用細火慢慢煲熱水咁，加上無雜質嘅水，就算熱到超過攝氏100度，都唔會沸騰起泡。雖然表面睇嚟唔似水滾，但當放嘢入啲水，好似茶葉咁，雜質就會俾水依附而有機會沸騰，「巴巴聲」湧起水泡，噴啲蒸氣出嚟。你以為啲水唔滾，毫無防備情況下俾蒸氣整傷。
原來係咁，但如果叮湯或者牛奶，又點呀??
吳教授話，因為牛奶同湯冇清水咁純，裏面有雜質，所以睇到沸騰；佢話唔建議用微波爐叮水，真係要都唔好叮太耐，最多一至兩分鐘就好。;-)
講開又講，用微波爐仲有好多要訣，例如叮馬鈴薯、熟蛋，要用牙簽插幾個小孔，預留空隙畀水蒸氣釋出，就唔會爆炸。仲有，調味料應該喺煮好後至加上去，因為鹽喺微波入面，會令啲肉變韌，冇咁好食。
微波爐，方便又慳電，真係我哋單身貴族嘅最愛，不過，就記住小心啲用呀。bye！:-)
逢周二刊出