昨日港股開市頭1個鐘頭，跌唔夠80點，中午收市都只係跌186點。去到下晝，日股散300點新聞入市，港股插水，個半鐘頭交易再散321點。
上周五總成交294億元，昨日增至399億元，多咗超過100億元。個市雷電交加，有啲恐慌性拋售現象，唔做嘢唔會錯，不妨喺報價機側邊貼個忍字。要做嘢，𠵱家買P輪已失先機，買C輪則最好等總成交縮細，或者等恒指跌落15400/15500，先至伺機行事。
滙控C輪9535：滙控（005）本月中旬股價急升，喺倫敦市場交投好勁，有啲啲答案。原來巴克萊增持1.293億股（價值超過170億元），持股量由3.25%升到4.35%，就嚟拍住瑞士信貸。
滙控同美國嘅銀行股相比，都係略貴，但同本身以往嘅數據相比，則屬好抵。英國佬睇好滙控，吼住再平啲，例如跌到130元邊邊，低位買C輪博反彈，細細注，睇9535。
中石油C輪4553：中石油（857）收8.30元，跌0.50元，好少有咁嘅跌幅，博跌到8字齊頭反彈，雞仔注吼C輪。既然雞仔注，交投唔旺嘅都冇所謂，至緊要數據靚。吼4553，8月初夠鐘，輪價78仙，溢價4.3%，槓桿率10.6倍（有效7.2倍），引伸波幅34.2%。賭高溢價大槓桿率嘅C輪，就要食得鹹魚抵得渴；4555大熱貨色，昨散51%，博呢類輪唔係人人啱。
章盛