呢兩年意大利餐廳多如雨後春笋，混水摸魚嘅雜牌貨，真係令人失望過唔知幾多次，點先擔保自己可以食到正牌貨？計我話有名人撐場就最信得過，新開嘅意大利餐廳中，有名人Armani擔大旗嘅，亦有曾為教宗備膳嘅正宗大廚，意大利迷Don'tMissOut！
記者︰劉昱蘭
攝影︰楊錦文、陳偉強
全球首間Armani酒吧餐廳
國際知名設計師MrGiorgioArmani對香港真係情有獨鍾。繼香港擁有全球第二大的Armani旗艦店，𠵱家又開咗全球第一間Armani酒吧餐廳。Armani一手包辦餐廳設計，同佢一貫簡單、深啡與灰黑調子相襯。餐廳食物則由行政總廚ClaudioConforti負責，生於佛羅倫斯的Claudio，將意大利北部的托斯卡尼菜式帶到香港。嗰度山林盛產野菌，而且沿岸海產多，好多菜式都有黑松茸，大廚都好拿手整海產，嚟到餐廳必order！
法國鵝肝配意大利飯 $178
Armani式嘅簡約，鵝肝外層香脆，入口即溶，加入黑松露、黑松茸油及Barolo意國紅酒，鮮菌味至正。
ARMANI/BARHK
蜆肉意大利麵 $188
蜆肉有一種海水味，感受到意大利空運到港嘅意式風情，香港邊有咁靚嘅水質，食到呢種自然風味吖!?
a.以0卡路里的Vodka調配成的PassionateKiss（$80），熱情果味濃，Ladies飲多兩杯都唔怕肥。
b.酒味濃的Martini，竟然搭上清新健康的奇異果，KiwiFruitMartini（$75）配搭好Fresh。
c.HighSocietyCocktails（$138）用咗冧酒、力嬌酒、君度酒調成，酒精成份幾高，但易入口。
ARMANI/BARHK（28050028）
地址︰中環遮打大廈2樓
Zeffirino 教宗都係客
Zeffirino除咗鍾麗緹、陳細潔、鄭少秋、吳鎮宇係座上客外，總廚FabioMariella更去過拉斯維加斯煮過餐畀CelineDion食。Fabio話佢個人好平易近人，嗰晚最鍾意食個意大利雲吞，同佢嘅性格一樣鍾意啲簡簡單單嘅口味。Fabio師傅意大利總店行政總廚GianPaoloBelloni仲勁，約望保祿二世都試過佢嘅手勢。Gian喺前日嚟咗香港，一連兩晚（5月26及27日）會喺「特色意大利美饌名酒宴」一顯身手，想有教宗嘅待遇就唔好錯過。
特製意式雜肉芝士配香草忌廉汁 $178
雜肉碎包括咗牛肉、豬肉及火雞肉，配香草醬Pesto，充滿總廚家鄉熱拿亞的風味，係鍾麗緹至愛。
Zeffirino
熱那亞式千層海鮮魚塔 $188
曾入選《健力士世界紀錄大全》「世界上最大的沙律」。1997年Gian煮咗個畀2,000人食嘅超級大沙律，有千層海鮮魚塔，今次可謂係濃縮版，是總廚的首本名菜之一。
Zeffirino（28371799）
地址︰銅鑼灣富豪國際酒店31樓
TEO「麻甩佬」講意大利粗口
唔講唔知，餐廳TEO原來係串錯字，不過係刻意錯嘅！Teo認為與其讀音相同的Tio，係意大利粗口，解作「一班麻甩佬」，唔想粗到出面，咪專登串錯囉！從餐廳名就知班股東團係一班大細佬，其中一個就係吳啟華。
原來佢哋都有個情意結，就係一得閒就會去意大利行吓，品酒都唔飲大路嘅智利、法國酒，一味都要意大利。鍾意自然高要求，佢哋覺得香港雖然好多意大利餐廳，但做得認真嘅真係好少，如分4級嘅巴拿馬火腿，出面食到都係2、3線多。出面食唔到好嘅，咪自己開間正貨店囉！
凍沙巴翁配芒果汁 $45
以Cream、蛋油、冧酒、焦糖製成嘅傳統意式甜品沙巴翁加入咗nuts，幼滑有咬口，好似食緊雪榚咁。
TEO
芒果蟹肉沙律 $88
鮮甜的蟹肉加埋香甜的芒果，食落覺得好清爽，嗒嗒吓仲有啲薄荷汁味，好開胃醒神。
龍蝦闊條麵 $138
TEO的麵全部都係人手製，連呢個麵的Pesto醬都係自家製，大廚話連醬料都係自己打，Brasil香草味夠鮮夠濃靚過罐頭咁話。
TEO（23690701）
地址︰尖沙嘴天文台圍諾士佛廣場A舖
