到史丹頓街/鴨巴甸街「爛撻撻」食晚飯，食物就精彩嘞，可惜人客少，得三枱人，都唔知老闆萬事德如何維持；不過常客驊少話有時呢度會坐到滿瀉嘅，拉扯估計唔會蝕好多啫。開餐館，其實好難賺錢，唔好以為喺蘇豪區就掂。
甜品生果未到，已經夠鐘立即走人，一出門口（鴨巴甸街），啱啱有一架的士駛落嚟，於是一秒鐘之後就上咗的士，司機竟然開腔話佢自《蘋果》開檔後就轉睇《蘋果》，日日睇左丁山，問左丁山係邊一位，唯有不予置評。司機又話佢住響馬鞍山，發覺喺新界九龍好難有「大旗」，即使有「大旗」，九龍客往往要求七折八折，於是冇肉食，反而港島人客就唔會計較，爽手好多，所以佢情願日日到港島開工，放工時間密食當三番，久唔久就有一枝「大旗」（即長程客），好過在九龍新界搵食。
講起馬鞍山，記得以前有商場嘅死角位冇人流，長年丟空，後來馬會想話租嚟開投注站，業主大喜過望，租金都唔計較咯，點知有一啲區議員計較，搞關注組去抗議馬會「鼓吹賭風」，政府立即腳軟，於是投注站開唔成；究其實，馬鞍山區內有冇居民想有一個投注站呢？梗有啦，如果每區都可以舉行全民投票，你估邊一派會贏？左丁山就好想知道甚麼關注組能夠代表幾多民意。
記得幾個月前立法會召開公聽會，就博彩稅改革（官方術語就係「二○○六年博彩稅（修訂）條例草案」）聽取公眾意見，一位叫做寫過馬經，資歷極淺嘅前評馬人自稱代表一個「香港賽馬業工作者聯會」，出席發言，反對博彩稅改革。問番評馬五十年嘅老前輩老惠，寫馬二十年嘅余伯樂，佢兩位都講，從未聽見過有一個咁嘅「香港賽馬業工作者聯會」。呢位仁兄到立法會講嘢，究竟有乜賽馬業代表性，要啲尊貴議員自己判斷。改革博彩稅，以挽回投注額下跌趨勢，未必一定得，但總要試一試，而且不會鼓吹賭風。所有靠評馬，報道賽馬嘅記者、編輯，以至報販、馬經印刷廠等等，為咗飯碗，都會支持博彩稅改革啦，邊會走上立法會反對㗎。請尊貴的議員認清楚真正業界意見！