港股受到外圍股市勁跌拖累，恒指昨日暴跌507點，雖然好多芬佬都話港股基調良好，大家唔應該咁驚青，但坦白講句，小初個心真係好怯。
除咗被對沖基金用嚟質低大市嘅大藍籌，以及因商品期貨急跌而被狂質的資源股外，就連好多先排熱炒嘅股票都跌到四腳朝天，例如傳私有化但冇咗下文嘅儀征化纖（1033），勁跌16.85％，收1.48元。此外，華基光電（155）勁跌18.8%至0.56元，中國水務（855）亦挫14％至1.74元。
至於一直獲多間證券唱好的大陸消防股海灣控股（416）亦唔例外，昨日急跌11％，收2.60元。經紀黃話，最近有證券界人士見過海灣管理層，據講公司可能收購大陸競爭對手，令市場佔有率提升1成以上，但有正面傳聞亦冇用，隻股昨日一樣大散。
經紀黃又話，雖然𠵱家望落好多股份好超值，亦有芬佬大大聲話想趁低吸納，但家陣風頭火勢，都係睇定啲好，無謂咁勇。
慕容小初