近排樓市氣氛麻麻，好多準買家睇唔清個市，寧願暫時擱置買樓大計，租住樓觀望大市走勢。好似屯門樓王卓爾居咁，有個醫生客原本諗住入市，買個200萬左右嘅兩房單位，點知撞正近排個市唔係咁明朗，於是轉買為租，但係又唔想俾份租約綁死，於是同業主傾好，由一年死約一年生約改為半年死半年生，方便佢半年後再作決定，中原卓爾居分行經理葉瑋珩話，呢個方法最啱心大心細嘅準買家，不過最緊要同業主傾掂數。
呢個醫生客最終租咗2座高層E室，652呎，月租6300蚊，呎租唔使10蚊，但比市價略高。葉瑋珩話，卓爾居今個月嘅租務成交比上個月同期多咗少少，相信同近排樓市唔明朗有關，即使有實力如醫生都暫且租住樓先，可見買家信心幾薄弱。