搬寫字樓對商業機構嚟講，係好煩嘅事，因為要重新印過晒啲卡片同信紙等，仲要通知番啲客，幾咁煩呢。租咗金鐘力寶中心第1座10年嘅卓先測量師行，最近就搬咗去第2座，但係租用嘅樓面冇乜多到，究竟搞邊科？
聽聯席董事潘子明講，新總部面積逾6000方呎，同舊嘅差唔多，但係舊總部佔用3個單位，有3個獨立門口，每次續約都要同3個業主傾租，認真唔方便。佢補充話，當年公司擴充，租埋隔籬兩個單位，至出現咁嘅情況。
咁啱傾續約時，見到第2座有個咁上下大嘅單位放盤，所以先決定執吓位。
𠵱家就算重新安排個啲座位，同事都坐得好鬆動，所以公司計劃請番啲應屆畢業生，加強各部門人手。
原來卓先新總部嗰層，當年係由佢哋幫個客買入，之後拆細出售，部份保留收租，呢個單位聽講衛視曾經用過。不過，卓先都用咗成百萬嚟裝修。咁第日再傾續約時，就唔使咁煩嘞。