今年未有大動作賣樓嘅恒基地產，旗艦屋苑西灣河嘉亨灣，舊年底今年初入伙以嚟，都未借出售現樓清貨尾。聽講，恒基想等現址示範單位同會所完工，先展開新一輪清貨攻勢。 噚日發展商就率先同代理行高層睇會所設施，除咗有美容水療服務外，仲有新屋苑較少見嘅粵曲房供租用，咁呢班粵曲發燒友就算唱到幾大聲都唔怕俾人投訴滋擾啦。 據講，恒基今個禮拜五同六兩日會搞貴賓日，趁機賣現貨，之不過，個市又唔太明朗，又遇上股市大跌，發展商又會出乜嘢法寶抗衡逆市呢？