地產同諾貝爾獎本來大纜都扯唔埋，不過，近呢幾年，新鴻基地產同中文大學合辦咗個諾貝爾得獎學人傑出講座系列，今年已到第5屆，所以近年大家每年一次，都會見到新地嘅郭氏兄弟同諾貝爾得獎學人同台出現。
講座噚日起舉行，新地副主席兼董事總經理郭炳聯今次唔止請嚟經濟學獎得主，仲搵埋物理學獎得主丁肇中教授，同化學獎得主KurtWuthrich教授；仲有一大突破，就係將講座現場直播至北京大學，話要體現學術無疆界喎。
尋求最大利益
首場講者係以博弈論研究享譽國際，取得05年諾貝爾經濟學獎得主奧曼（RobertJ.Aumann）教授，佢圍繞《戰爭與和平》呢個題目，講咗好多佢嘅見解，話戰爭可以係理性嘅，主戰者喺佢哋取得嘅訊息之內，為自己尋求最大嘅利益；例如當年美蘇冷戰期間未爆發大戰，主要係各自擁有核武威脅對方，令大家唔能夠確定打仗能帶嚟更好嘅結果，咁樣反而造就咗一個平衡狀態。
對於猶太巴勒斯坦同阿拉伯巴勒斯坦之間嘅長期紛爭，佢話係猶太巴勒斯坦太急於取得和平先搞到咁，如果佢哋好似阿拉伯巴勒斯坦咁多啲耐性，經過長時間互動後相信可以合作，達致對雙方有利的協議。
不過當一名市民問佢，兩岸保持現狀，最終會否統一，佢就唔多清楚喇！