𠵱家啤酒都鍾意搵人搞Crossover出產品，「硬嘢」梗係唔可以輸蝕。最近芝華士就搵嚟葛民輝搞Design出產品，絕對唔會好似啤酒麻雀咁等師奶嚟排隊玩，但就一定會召集到一班潮人狂隊狂換。想證明阿葛唔係單靠個名馬虎了事，就要即刻睇睇各產品嘅特色設計，款款都唔係交行貨，貨車變流動足球場，死未？
記者：許維雅 攝影：楊錦文 訪問場地：Lot23（28335901）
玩帽玩Tee玩埋車
今次合作系列名為「Chivas+葛民輝變身足球Gear」，包括PoloTee、Cap帽、頭巾同埋貨車。系列以多變化為主題：PoloTee可以換上16個不同國家嘅國旗繡章，方便球迷為自己鍾意嘅球隊打氣；Cap帽向前戴係TruckCap，掉轉戴就變成單車帽；頭巾竟然可以變TubeTop！不過成個Project最具創意之作，係將貨車變成流動足球場！
出巡日期 地點
6月9日至10日 尖沙嘴棉登徑
6月16至17日、23日至24日 銅鑼灣登龍街
6月30日及7月1日 灣仔日善街
（時間：9:00pm-12:00mn）
就咁話係芝華士出品，球迷一定會嫌係贈品，換咗都未必想用。所以今次酒商聰明地加埋葛民輝個大名，由設計到製成推出都由阿葛一手包辦，佢就緊張到請佢同啲Products合影都唔肯制，因為初辦顏色未如理想喎！有啲執着先叫專業㗎嘛，明晒！
4A百搭設計
葛（葛民輝） 記（記者）
記：做過咁多個Project，最鍾意邊個？
葛：最鍾意98年FMUNION呢個Logo嘅產品，個猿人頭加個Headphone落去，話到畀人哋聽我係DJ。好少人肯將自己個Logo俾人咁改，出嚟嘅效果又好好，係我自己最滿意嘅創作。仲有一個係4ALogo，4A係我嘅創作單位名，呢個單位係方便我唔用自己個名時用嘅。一早預咗4A會同不同單位合作，所以個Logo特登設計得簡單啲。如果好似啲名牌子個Logo咁惡，同人合作就好似喧賓奪主、打擾咗人咁。
記：𠵱家有啲咩自己好想參與Design，但又未做過呢？
葛：一幢樓！室內設計就做得多喇，真係幾想設計一幢樓出嚟。至於設計咩外形嘅樓，就要睇吓幢樓喺邊，就好似登龍街咁，周圍啲樓都逼逼狹狹，我就想設計一幢空間感好強嘅樓，而且唔會用盡塊地，會喺樓嘅兩邊留兩條巷仔，頂部就會係一個波形設計。不過設計樓要諗埋好多結構上嘅問題，唔係咁簡單。
記：由開始收到Order到明白客人嘅要求，要花幾耐時間？
葛：至少都要傾2次，因為通常第1次啲客一係怕醜一係講大話；到第2次熟咗，用啲問題戳吓佢哋就會原形畢露。好似有個客叫我幫佢設計間屋，最基本要了解到佢性格同埋佢想要啲咩，會同咩人住。有次見到個客有鬼咁多鞋，但係又話自己會丟，新屋唔會擺咁多；到第2次同佢講話設計咗個鞋架畀佢，淨係放得幾對鞋，佢又會即刻話：「咁又唔好咁誇張，都仲有好多鞋要擺嘅。」
設計贈品隱藏Logo
記：今次同芝華士合作產品有咩特色？點解全部用黑色？
葛：由於老闆想產品有多元化嘅效果，所以就有隨時換國旗繡章嘅構思，於是用咗類似Fleece嘅物料，有魔術貼嘅效果，方便隨時換上不同繡章。好多時贈品都唔係咁多人會用，揀用黑色係因為夠穩陣，咩年齡都啱，再加上橙色就係芝華士Logo嘅顏色。
記：自己設計呢類型嘅Project最大難度喺邊呢？
葛：今次整個Design只得一個月多嘅時間，其實都幾趕。除咗要控制Budget，又要滿足老闆要求，啲老闆最鍾意有大大個Logo印喺啲產品上面，但咁又好似好老套喎，所以都幾大挑戰。所以我就設計咗個繡章畀啲人黐上件衫度遮住個Logo，咁咪又滿足到老闆，啲人平時都會着囉！設計呢啲產品最大滿足感都係有人着上身啫。另外因為呢啲產品產量唔多，所以控制成本要做得好好，揀啲物料用到嚟做帽之餘又可以用嚟做衫，好多廠都有MinimumOrder。
查詢：23786934
網址：www.chivas.com.hk
