4年一度嘅世界盃仲有3個禮拜就開始，攞咗今屆賽事播映權嘅有線電視，已開始推出宣傳短片，但就未見佢哋大力推廣，聽講佢哋嘅宣傳攻勢會喺下個月頭先主力催谷。由於上一屆佢哋喺整個賽程入面，搞咗個世界盃嘉年華，都幾受歡迎，有波睇、有得飲有得食，仲有遊戲玩。所以今屆佢哋亦會照辦，地點依舊喺九龍灣會議展覽中心。
嘉年華當然係畀啲忠實客戶啦，此外，𠵱家裝有線電視，簽約十八個月嘅新客，亦可以有兩張飛去睇。唔怪之得有線海哥吳天海好淡定咁講，上客會比對上一屆好，而且上客高峯期會喺世界盃揭幕戰（6月9日）後出現，佢笑笑口講，因為好多人發覺只有Cable先可以睇晒全部賽事。