眼前的張琛，一頭長髮、妝容一絲不苟，如果不是身穿白袍，很難聯想到她與以年長人士主導的中醫行業有關連。來自醫學世家的張琛，先祖已在清末行醫，祖父母是眼科醫生，父母因文革無從習醫。自小來港定居的張琛也從無想過自己會一圓父母懸壺濟世的心願，而帶領她走上學醫之路，竟是她先天的病痛。
信佛淨化心靈
念完中學，張琛與很多香港人一樣，投入商業機構，沾過電腦、營銷、代理精品等行業，97年金融風暴，她生意失敗、炒樓輸掉大筆資金，令她先天心律失常復發，「我先天個心就唔係幾好，會成日心跳、頭暈，睇過好多醫生。」結果在朋友介紹下，她認識了由內地來港的一位老中醫。
「佢係一個好仁慈、好慈悲嘅老人家，佢同我講，我嘅病係由心情開始影響，個人唔開心，情緒唔好，就會病。」當時醫生為她拔罐、刮痧、穴位治療，又用上放血、瀉血等傳統療法，令她於短短一年內痊癒，「佢覺得我好有天份，就畀我跟佢學中醫，我當時放低晒所有工作，淨係學打坐就學咗三年。」
三年的修煉，令她的心變得清澄明亮，「令到我悟到好多嘢，信咗佛。」她後來修讀了港大的中醫學課程，又到上海跟名醫學習，在香港執業不到十年，客源不缺，她現時最大的心願，是將中醫學發揚光大。
她記得兩年前一位婆婆在其診所等看症，突然急性哮喘發作，即時休克，職員即時召救護車，在場其他病人都很焦急，有人更憂心流淚，「我即時同佢做針灸，喺穴位做瀉血，十字車未嚟，佢條氣已經順番，我講呢件事唔係想誇獎中醫，而係講緊中醫診所唔可以有儀器，令到我哋中醫做嘢，好似紙上談兵。」
她慨歎香港的中醫被「綁手綁腳」，工會組織鬆散，惟有中西醫結合，才能幫到病人，「唔同嘅醫學都唔係萬能，應集各家嘅所長，但香港同大陸比，有排都追唔上，中醫只可以門診，做到嘅嘢好有限，唔可以轉介病人驗身、入醫院，最終受害嘅都係病人。」
記者：張嘉雯
逢周一刊出