噚日有報紙話前年患上結腸癌嘅馬力，最近嘅脈象同免疫力指數轉差，瀕臨癌病復發邊緣，𠵱家正喺廣州療養，嚇咗好多人一跳，紛紛打電話問候馬主席。
馬主席一聽咁嘅新聞就大叫「亂噏！」佢話自己嘅脈象同免疫力指數唔係幾好，所以要留喺廣州check吓先，但就肯定唔係報紙所講，話就嚟癌病復發咁嚴重。至於要留院幾耐，佢都答唔到，只可以做個乖病人，一切聽從醫生吩咐，搞掂晒先至出院。
查實馬力最近整傷咗肩叢神經，搞到左手乏力，只有三隻手指可以輕輕郁吓，要繼續做物理治療。佢仲話自己咁嘅情況，都係因為喺香港太忙，少休息之故，𠵱家就要趁機唞唞喇，所以短期內佢都唔會返香港。馬力仲託八方同大家講句多謝關心，叫大家唔使擔心。
傳真︰2623-9278
電郵︰[email protected]