序：先講一段小記的瘀事。話說今年巴塞爾錶展採訪期間，小記有一日採訪工作完畢，不想一個人回酒店叫RoomService，於是便厚顏地「掹衫尾」跟住BALLWatch的公關朋友黐飲黐食。席上大多是報紙行家，唯獨一位年輕女子不認識，朋友作介紹，女子遞上名片，名字是GigiChao，行頭也是一間公關公司。小記第一眼覺得此女子生得眉清目秀，同時覺得恁地眼熟，好像之前已見過的，心想是公關朋友的同行，或者之前在採訪場合見過呢，當下便沒追問。飯後回酒店整理名片，將她的名片反過來一看，背後有中文名寫着「趙式芝」。趙世曾的女兒？原來是名人來呀，跟我心目中那種名媛千金穿金戴銀出席Ball場的感覺很不一樣；此事印證小記的遲鈍之外，趙小姐也給我一份相當踏實的感覺，好感更深了一層。
記者：吳小明
攝影：黃子偉、何家亮
化妝：AngelWong
髮型：Jay@i-chihair
場地提供：i-chihair
部份相片：壹週刊、忽然1周（黑白照片）
然後是今次的人物專訪。編輯說主題是「我有我道路」，我想起趙式芝來。不是嗎？名人之後理應不用憂柴憂米，大可UnUn腳買名牌歎HighTea，但趙式芝給我的第一身印象很實幹型，一點也沒有千金小姐的浮誇氣；另一方面，父親是名聲不能夠說好的花花公子，女兒卻鮮有緋聞，也不多見她流連夜場蒲天光的八卦新聞，很對題嘛，是不？理所當然以為這篇專訪好易做，豈料一通電話，Gigi說她自6歲起已經「俾傳媒跟到大」，沒有甚麼好寫，我有甚麼想問儘管問。是的，要問她甚麼好？
你憎恨父親嗎？
覺唔覺得有時你老竇啲行為好𤓓？
老竇大把錢，點解仲要落手落腳打份工？
你媽咪姚煒曾經透露過驚你係同性戀嘅，到底係唔係？
結果，我第一條問題是，你大學是念甚麼的？驚青到死，自己都覺得自己無鬼用。
學不致用
念的是建築，卻當了公關，算不算學以不致用？「我無天份囉。」實情是父親催谷，Gigi16歲已跳班入大學。「當時年紀太細，根本唔清楚自己志向，加上爹哋也是建築師，眼見自己一向鍾意畫公仔，心想也有點藝術天份，便替我揸主意。」
數年大學生活卻很不如意。「當時根本Handle唔到這一科；爹哋媽咪之間關係又複雜，細細個經已覺得好唔公平，點解人哋有一個完整嘅Family，我就好似四處飄泊居無定所咁，好唔開心，也影響到學業。」
趙世曾：你別插手公司業務
畢業後Gigi到過馬來西亞工作，也在美國幫過媽咪打理其生意，從中培養出對Marketing的興趣。回港後不久即跟友人自組公關公司，其間也到父親的建築公司幫手，但短短半年因為處事方式不咬弦，父親叫她還是專心做她的公關工作，建築公司業務別插手了。她曾經為此事情緒低落好一陣子。「一方面諗係咪自己做錯嘢，另一方面亦因為意見相左嗰個係自己爹哋，心情更難過。」
有名氣省宣傳
不過Gigi說從來不會跟父親嗌大交，只會悶在心裏。後來她主動寫了一封信向父親剖白心情，父親也諒解，「以前細個有乜唔開心都選擇逃避，但若果肯正視問題，或者可以將阻力化助力，唔Work嘅事變成Work，至少Workforme都好。正如我以前好怕曝光，時時諗點解要活在父親的陰影下，如今我做了公關，反而掉轉頭諗正係呢一丁點嘅名氣成為工作上的助力，我唔使大費周章別人已知我係邊個，當係上天恩賜我係趙世曾個女，唔係更好咩？」
建築=公關？
正如念建築，到頭來當上公關也如是觀。「看來我無學以致用，其實公關工作也講求創意。一般人以為做公關即係拉關係，但當中牽涉到的學問可大呢，見客寫Proposal，一寫便30多頁，又要文字靚又要Graphic好，創意及溝通缺一不可。」
愛恨父親
那Gigi怎樣看父親的感情生活？原先想問的「覺唔覺得有時你爹哋嘅行為好𤓓？」也衝口而出了。
「真係唔覺喎，咁爹哋真係孝順，嫲嫲嘅東西係不應亂咁送出去，這是對嫲嫲的一種尊敬。」對父親是出名的花花公子一點不滿都無？「自細同媽咪相處時間比較多，當然會同情媽咪多點，亦可以話唔諒解爹哋，但同唔少以前嘅男朋友講開，佢哋都會話羨慕我爹哋事業有成，生性風流，簡直是男人嘅典範，啼笑皆非之餘，反過來想想其實也是事實。」
負笈期間 只見過一次
Gigi自小同父親很疏離，6歲就跟母親姚煒到美國生活，從初中到大學，她就獨個兒赴英國和法國。讀書期間，父親只探過她一次，當年送她到英國讀書，也不過是趙世曾與當時女友TerriHolladay歐遊順道而行。回港後這些年間，與父親關係才逐漸修好。「有時會諗其實係咪太過想親近爹哋，因為愈得唔到愈渴望得到，連男友都撞着啲同爹哋一樣咁風流嘅！」
成長歷程
男人風流
既然講到男友，打蛇隨棍上問Gigi有無拍拖？她想也不想便說現在感情一片空白。「我拍過不下20次拖，但每次都係認真嘅，我唔會容許自己一腳踏兩船或者玩玩吓。可能真係因為爹哋，我追求穩定嘅感情，亦因為咁對感情事好無安全感。有時逼得身邊人太緊，成日想深情對話呀咁，好多男人頂唔順！𠵱家學緊放開啲，人哋反而會緊番我轉頭。」
「緊番我轉頭」？才說感情現況一片空白，似乎口供唔夾喎。「我𠵱家真係無拖拍。有時見到身邊女性朋友可以好小鳥依人咁黐住男友，就會諗點解自己咁失敗？好多香港女人口口聲聲事業為重，但心底依然最想結婚生仔，惟有表面死頂扮撇脫。」
情場 不是公關
才27歲女就諗得咁灰？也不完全是，「心目中理想嘅關係好簡單，都是可以一齊成長、互相諒解同遷就呢啲。有時見身邊朋友好識處埋感情，幾時鬆幾時緊都拿揑得準繩，自己點解學唔到？難聽啲講即係唔識玩手段。我明白識玩心理戰喺情場上會得心應手好多，但兩個人相處都要玩攻防戰，呢段關係係咪自己想要？呢一刻我仲未決定到，只知自己想要嘅嘢好簡單，Betruetomyheart，所有關係都建基於一個信字，無論係生意夥伴、伴侶、屋企人都好，信咗先，到時若果見唔對路先再算。」
趙式芝
年齡：27歲
現職：君臣公關有限公司
學歷：英國曼徹斯特大學建築系
家世：爺爺為已故船王趙從衍，父親是花花公子趙世曾，母親是姚煒
家族資產：約10億
後記：
Gigi說她有一門獨到的減壓方法，可以說出來同大家分享。好多時到客戶公司做Presentation，獨自拿着大叠的文件、坐在偌大靜英英的會議室內，心情會不期然繃緊起來，那短短數分鐘特別難熬。Gigi會除下手錶拎近耳邊聆聽那「的搭的搭」的秒針聲，心情會馬上平靜起來。記起她曾多次送贈手錶給爸爸作父親節禮物，不知她這門減壓秘方，是否起着見錶如見人的作用？
