嚟咗香港個幾禮拜嘅烏干達Watoto兒童合唱團，噚日喺會展完成咗佢哋最後一場演出，呢一場亦係華華之前提過，由渣打集團贊助嘅一場，場內500個位，一半免費招待員工。華華噚日都去欣賞呢班6至13歲小朋友嘅演出，個個表演精采投入，贏得唔少掌聲，渣打大中華及東北亞洲區財務總監馮隆春睇足全場，投入到手舞足蹈。
之前渣打為呢個合唱團搞過預演，由大中華區及日本區企業客戶部主管包明澤撐場，噚日《希望之聲音樂會》演唱會，輪都輪到馮隆春出嚟主持大局，佢仲同一班本地義工影相。銀行員工話就話一星期可以返5日工，但做得高層，就日日冇停，隨時都要工作。