連續幾日洛杉磯E3，着實太多新機及新Game資料發布，電腦男做到上氣唔接下氣，搞到好耐冇同大家見面㖭！新嘢就睇完喇，不過人氣話題停不了，尤其網上各大討論區更為激烈，任記、索尼兩大陣營Fans，各守陣地力陳對方機種之不濟，最慘係嚟嚟去去「三幅被」，氣氛相當之唔健康！唔好話網上機迷討論，就連電腦男跟「撈Game」嘅同行食飯閒聊，居然亦出現極主觀嘅死硬派言論，一班人拗到面紅耳熱，差唔多要分枱食飯咁濟！
查實電腦男對3大主機未來走勢，的確有好多愚見，好似任天堂Wii潛在嘅弱點、SONYPS3平反論、XB360定位等，好多嘢都想同廣大讀者分享！所以嚟緊一連幾日，電腦男都會喺度大發謬論，講吓自己心頭好。咩話？你又有嘢想講？得！電腦男就讓出個地盤，畀大家一齊發表自己意見，啱聽啱睇刊登埋嘅，仲可獲得有錢都買唔到嘅遊戲精品㖭。來稿「毋須」中肯，最緊要有Point，撐人同踩人都要有道理！
來稿要點：
＊稿件字數不可超過500字，本欄有絕對刪改權。
＊每段稿件請集中評論某主機或遊戲，歡迎多段式投稿。
＊稿件可電郵至[email protected]
＊來郵請附姓名/筆名、聯絡電話等簡單個人資料。