正所謂韓風吹遍全世界，呢種風氣就連家庭遊戲都走唔甩；嚟自電腦界RPG名作《真名法典》（Magnacarta），就有韓式《FF》之美譽，賣嘅並唔係系統或者古仔，而係著名畫師金亨太筆下靚到爆嘅型男索女。如今推出PSP版，畫面強化之外，女隊員間嘅友好度亦成戰鬥成敗關鍵，想打得輕鬆，就要多啲親近隊友！
文：陳福榮
呢隻韓國Softmax超人氣製作，舊年被眼鏡廠獨具慧眼睇中，移植到PS2而令唔少㗎仔另眼相看！無他嘅，向來遊戲市場都係日本廠惡晒，更何況傳統到痹嘅RPG？因此佢谷到咁Hit真係有佢一套。𠵱家PSP版變成16比9闊銀幕，畫面效果更加細緻，而且PS2已經非常吸引人嘅開場CG片今次會照樣足本搬落嚟，透過靚靚闊畫面俾人一種更震撼嘅臨場感。另外為咗方便PSP用家，開發小組特登調校過啲顯示字款，務求大家可以睇得更舒服，玩得RPG一定好多字要睇，如果睇得唔順心就好易冇心機玩到尾，咁就嘥晒廠方成擔心機喇。（編按：PSP《惡魔召喚師》就係字款變形、極欠誠意移植之例子）
隨時換衫過癮至極
今作一大特點，只要達成特定條件，就可同兩位主角換衫，以特別造型同大家見面！男主角加連治嗰身黑紅配搭，整到佢當堂邪惡唔少，而女主角莉絲仲誇張，黑白兩色比起平時黃衫搶眼得多，黑色賢淑白色冶艷，啱晒唔同人士要求。再者換衫效果喺地圖畫面都能即時反映出嚟，對於玩過PS2版嘅朋友當然係最吸引啦。PS2版為人詬病嘅，就係版圖移動嗰陣有個DetectMode，因靠佢嚟搵寶物而搞到成個節奏慢晒。PSP版改做CounterMode，主動進行先制攻擊，唔會「窒窒吓」，移動時明顯爽快好多。
友好度影響戰鬥
原本佢好講求隊員之間嘅友好度，假如友好度太低，戰鬥時就幾乎唔會郁手咁滯，實行俾人打到飛起，𠵱家就改良為根據全體隊員平均友好度嚟影響行動，唔會咩都唔做咁大劑，再加埋講求輸入指令時機嘅玩法，咁樣打起嚟都會合理好多。
另一特色係增設遊戲插圖嘅鑑賞模式，除登場人物同怪獸外，仲有各種場景設定圖，至啱《真名法典》Fans用嚟收藏。就以人物資料為例，佢係根據玩家達成率逐個追加，換言之只要打爆機就可全部睇晒。
PROFILE
遊戲類型：RPG
對應機種：PSP
遊玩人數：1人
開發廠商：Banpresto
推出日期：5月25日
