早前被指因郭羨妮獲殼王陳國強力捧而失意告假的葉璇，昨日狀態大勇以低胸露背裝為亞視台慶宣傳，成為全場焦點，連家英哥都轉身搭訕，其間她更大方送波餅給傳過不和的陳啟泰（Ken），可惜阿Ken竟然表示感覺不到，且稱自己身材更勁。
葉璇、張文慈、陳啟泰（Ken）、麥家琪、羅家英、梁敏儀等昨日現身鑽石山荷里活廣場，齊齊宣傳亞視49周年台慶劇《情陷夜中環2》、《香港奇案實錄》及《紅孩兒》，三位性感尤物葉璇、張文慈及麥家琪均悉心打扮，當中以葉璇吊帶低胸露背裝最為搶鏡。
家琪：唔好睇無綫
葉璇風頭盡掩其餘女星，於台下就坐時經已被不少觀眾要求合照簽名，甚至前排的羅家英也特別轉身跟她傾偈。於台上大會安排示範防狼技巧時，眾女都表現得極之避忌，唯獨最性感的葉璇從後向陳啓泰大送波餅，不過事後阿Ken竟然說：「有咩？Feel唔到，我個波仲大啲。」
雖然家琪略為輸蝕，但宣傳新劇時不停買口乖，她呼籲說：「大家唔好睇無綫，睇吓亞視《情陷夜中環2》，畀條生路我哋行吓，咁先生存到。」贏得全場掌聲，不過事後放紙炮時卻不慎整傷手掌。
預告高收視再性感
眾演員對《情》劇信心十足，談到如能創出更佳收視會怎樣慶祝，葉璇說：「如果有雙位數收視，就開沙灘派對，咁多靚女實好睇，慶功順便大飽眼福，四哥可以着泳褲騷弗身形。」張文慈聞言即說：「佢自己咋，若果大家咁高興我都冇所謂，但係唔好吹水三點式加T恤。」當記者指她打扮未及葉璇性感搶鏡，張文慈即大方表示每人都贏一次才好玩，最緊要劇集大收。
採訪：馬建華 攝影：陳志嵐
