搞到全城瘋狂嘅中國銀行IPO，公開認購部份（用白表申請）聽日中午就截飛，呢單全球最大集資活動，反應一如預料般熱烈，各方人馬總算舒一口氣。單Deal咁矚目，做咗幾日頭條，乜都俾人講晒，但華華八到單漏網笑料，要同大家分享吓。
夾定用英文
話說中行上周三17號搞IPO發布會，過百中外傳媒一早到場，但只有幾個事前「溝通」好嘅傳媒，先有機會發問問題。呢家嘢華華一啲都唔覺得奇怪，事關呢種效法國務院「欽點」形式嘅記者會，喺國企發布會經常發生，甚為符合國情，至於是否有透明度大家心照。
之不過，華華聽聞其中一間被「欽點」嘅傳媒，早一日收到通知話有得問問題，但就指明一定要用英文發問。點解？原來係想藉此表現中行「國際化」咁話，而咁啱呢條用英文問嘅問題，就好技術性，答嗰個人嘅英文口音都好國際化（即係又唔中又唔西囉），結果搞到全場中外行家聽到耳都側埋！
其實個會已經係視像會議，董事長肖鋼同助理朱民身在美國，行長李禮輝就喺歐洲，港美歐三地開會，都夠晒國際化啦，仲使唔使咁刻意呢，又?
李華華
讀者如有任何意見或報料，歡迎發送電郵至
[email protected]。