保險界元老吉叔請食飯，席設灣仔老牌潮州菜館C記，C記開業二十幾年，總廚已換上新人。左丁山係廣東人，對潮州菜不甚了了，識食唔識講。吉叔就講究咯，佢係潮州鄉里，對家鄉菜特別重視，呢日點咗一啲左丁山平時唔識叫嘅菜，就係手撕凍龍蝦，桂花炒蟹肉，凍鶯哥魚等，每道菜都有調味品。陳會長話食潮州菜不可無調味品，食凍龍蝦要用「桔油」，果然味道完全唔同，賓架R話「桔油」由潮州桔製成，上環一啲潮州雜貨店有售，左丁山第一次試食，發覺係正嘢，於是請佢得閒就代買幾瓶。
單尾食潮州砂碢粥（非一般潮州粥，要預訂），配以欖仁、鹹蛋角，涼瓜煎蛋，美味無以尚之，侍應跟住送上油炸鬼，左丁山以為用來送粥，潮州賓架R話：「且慢，油炸鬼係用來送綠豆爽嘅！」食完粥，甜品綠豆爽上枱，加上油炸鬼，嘩，好滋味啫，點解以前從未食過？唔係潮州人，真係不知其中奧妙。
不過喺香港食一級潮州菜，好貴啫。陳會長話食凍蟹腳嘅話，一隻大蟹來自印尼，價格八百大元，剩係食蟹腳，咪要拆幾隻蟹？點會唔貴？賓架R話坐飛機去汕頭食大餐之後返香港，都冇喺香港食一餐「好正」嘅潮州菜咁貴。賓架R經常返鄉下，見到有一座一級體育館，係印尼華僑捐嘅，該華僑可謂衣錦還鄉！體育館造價不菲，華僑面子十足，可惜呀可惜，未到第三代，華僑嘅基業已經好似風吹雞蛋殼，佢嘅銀行家們為之眼坦坦，大家幾乎想收番座體育館嚟填補壞帳撥備！
福建賓架C話香港好多潮州菜館，過份遷就廣東口味，已失其真。佢舉一個例子，福建人煮餸，絕少打芡，但本港飯館賣「福建炒飯」，一定有一個大芡，根本上違反福建人煮菜方式。大家笑佢：「不如開番一間福建菜館啦！」賓架C苦笑：「我最近返泉州一行，最高檔嘅酒店竟然賣廣東菜，而又冇香港做得咁好，我想食一餐正宗福建菜亦不可得！」