一連多日同大家講傳媒業，今日就講番我「白銀文」最喜歡嘅白銀。孫柏文想同大家分享，我喺網上睇到一個解釋點解畢菲特（WarrenBuffett）冇我fan屎咁醒，搞到冇晒啲白銀嘅推測。首先我一定要澄清，因為以下嘅解釋純屬搞笑估估吓，完全係猜測，所以如果你係畢菲特旗艦公司「巴郡」嘅職員，就希望你抱住一個輕鬆嘅態度，去睇今日嘅《金手指》。
上進有野心青年A：「畢菲特先生，我諗到條驚世絕橋去搵錢。不過如果要成功用呢條橋去搵錢，就差不多一定要搵畢先生你先至可以。」
畢菲特：「講嚟聽吓，睇吓你條橋有幾驚世先。」
青年A：「我今日想同你講嘅係白銀，我相信你都知道白銀市場的情況？」
畢菲特：「知，近呢二三十年，每年白銀礦產都少過市場需求，一路都係靠存貨去滿足需要。白銀價錢照計遲早都要升，不過可以等到頸都長都未升喎！如果你淨係叫我買白銀，我淨係要放棄利息回報都會對唔住巴郡啲股東。」
青年A：「咁如果我叫你買嘅不單止白銀，仲要係實貨白銀，我諗你會更加唔信呢條係好橋，甚至要我即刻離開呢個辦公室。哈、哈！」
畢菲特：「係，我隻手指已經放咗喺叫實Q嘅掣上邊，如果你仲唔快啲到point，我就?落去。買實貨白銀？我不單止要蝕息，我仲要畀倉租，我啲股東會肯過我咩？」
青年A：「畢先生，唔好?住！我到point啦！我都知道你會擔心呢個問題，不過真係有個方法用買實貨白銀去搵錢。查實𠵱家個白銀市場都係一班投機者喺度炒作，佢哋個個都好貪心，靠借錢去做孖展買白銀。每一次有急促嘅跌市，佢哋資不抵債變負資產，仲迫於無奈咁接受低價賣晒啲白銀，搞到要蝕本離場。」
畢菲特：「就算係咁，我又點靠買實貨白銀去搵錢？」
青年A：「我呢條橋就係要不斷吸引新嘅投機者入白銀市場，同埋要一個人可以大條道理、理直氣壯咁短時間內賣大量白銀嚟打壓白銀個價。咁畢先生你去買實貨白銀就可以做到一石二鳥之效，一方面小型投機者見你買咁多白銀，就會因為你嘅江湖地位跟你入貨，仲會引埋班專業白銀投機者知道你有做過功課，明白要買實貨白銀先至影響到個基本供求，仲唔引起班友嘅貪念而買大量白銀孖展。」
畢菲特：「咁點打壓白銀個價？」
青年A：「正當你有大把實貨喺倉裏邊，每一次白銀價錢大升嘅時候，你就可以大條道理同銀行大班講話，要趁高價賣敢啲白銀走，以『對沖』為名，攞啲實貨白銀抵押去換紙上白銀拋售，白銀個價實俾我哋質到啲孖展客要離場。到時就可以喺低價買番晒啲紙上白銀返嚟，還番畀啲銀行大班。咁啲實貨白銀由頭到尾都喺你個貨倉度，咪可以重複又重複用呢條橋去搵錢。不過……」
畢菲特：「我Buy！不過乜嘢？」
青年A：「不過，白銀始終都係求過於供，我哋呢個計劃，只可以喺全世界嘅白銀存貨供應量一路都滿足到需求嘅情況下做，因為只要存貨一冇，我哋就算傾盡全力打壓，白銀個價都唔會跌。到時只會得番兩個選擇，一係我哋以更高價買番啲紙上白銀返嚟，一係就將實貨白銀交出去。」
呢個推測係一個叫做TedButler嘅人諗出嚟，只不過用我喺演藝學院讀過3個月嘅編劇技巧同大家分享，請大家多多支持！哈、哈！
孫柏文