最近有啲區議員話，收到由鄭經翰發出嘅信，話可以義助議員掛街板。八方聽到都覺得好奇怪，唔通大班錢多得滯，要派吓先至安樂？原來查實大家誤會晒，肯出錢畀區議員掛街板嘅，只係大班都有份組成嘅「H5N1禽流感關注組」，唔係外表又真係幾富泰嘅大班喎。
之不過，當然唔係阿豬阿狗話要掛街板，關注組都肯畀錢。大班重申可以獲得資助嘅街板，只可以用嚟宣傳點樣防範禽流感，如果係宣傳其他嘢，咁就可以慳番唔使問，事關唔符合關注組目的嘅，一律都冇行。
八方記得關注組內民主派人士居多，會唔會左派區佬攞錢會空手而回？大班堅稱左、中、右一概一視同仁，即係唔會學煲呔咁玩親疏有別啦。據知街板一般閒閒地都幾十至一百蚊成本，咁計法，關注組又幾落本喎。
傳真︰2623-9278
電郵︰[email protected]