現時市場焦點集中在中國銀行（3988）招股，唔少資金走咗去認購中行，加上大市唔知調整完未，無論芬佬同散戶都持觀望態度，睇怕大市呢個星期都係悶到飛起居多。
經紀黃話，其實可以搵啲較穩陣嘅股票揸下，分分鐘有驚喜，好似喺3月尾掛牌的中國建材（3323），上市之時正處新股熱潮之中，公開招股部份錄得逾500倍超額認購，隻股上市後，最高炒到近4元，散戶個個有錢賺。
由於阿爺怕經濟過熱，推出宏觀調控措施，搞水泥的中國建材嘅股價亦跟住回落，最低見過2.775元，貼近2.75元的招股價。雖然好多散戶已經食糊沽貨，但大戶如摩根大通等都重揸住唔少貨，摩根大通一直有買有賣，但家陣重揸住12.23％H股。另外，保薦人大摩喺上周五出報告唱好助拳，話目標睇3.65元。
中國建材上周五微升1.75％，收2.90元，距離大摩目標價重有一大截，睇落似乎諗得過。
慕容小初