有錢人時不時捐一千幾百萬做善事，唔係乜嘢新聞奇事，通常受惠嘅機構，都會好識做咁頒番個獎，搞個命名之類嘅儀式，表揚吓對方就算，好少似得萬寶龍（Montblanc）文化基金會咁，獎金獎品打孖嚟。
萬寶龍前幾日公布，「2006年萬寶龍國際藝術贊助大獎」嘅得主，係恒基四叔李兆基，佢哋除咗會送支限量版嘅「SirHenryTate」墨水筆畀四叔之外，仲會有一筆15000歐元（約15萬港銀）獎金；四叔咁有米，又點會在乎個十幾萬，所以佢已經開晒聲，話會將呢筆錢，轉贈畀中英劇團喇！
畀錢四叔已經夠另類，個頒獎禮嘅日子仲特別，邊日？咪就係6月6號，呢個百年一次3條「6」嘅大凶日，個儀式仲要擇定係下晝6點。咁多「6」，唔知係唔係諗住六六無窮呢？華華斷估呢日真係有啲特別意思，唔係又點會有咁嘅安排呢？