謝太：Karen？謝太啊。今個禮拜股市點睇？我記得上個禮拜同你講過，話新鴻基地產（016）十年一次嘅配股，都未必代表個市見頂，我諗我估計錯咗。
Karen：謝太早晨！上個禮拜股市都仲係跌，今個禮拜股市好難睇。其實我好同意你上個禮拜嘅說話，我都覺得新地係一間對得住小股東嘅公司，配股抽水都唔會喺個市見頂做，賺到咁盡。不過今次，可能連新地管理層都估唔到個市轉得咁快。始終都係今時唔同往日，香港可能真係被邊緣化。大陸公司間間來香港集資，間間都升，公司業務係啲乜都冇所謂，最緊要嘅係間公司係由大陸嚟，就會有人買。香港藍籌中嘅藍籌新地，一話配股，個市就即刻散晒，聽講話包銷商最後自己都要買，真係好慘。
港人迷信過江龍必有油水
謝太：咁又唔好咁悲觀，如果大陸公司嚟親香港上市之後，都繼續升，仲要升好多，而我哋老牌藍籌一配股個市就跌。我覺得只係表示，市場覺得大陸公司賤賣資產，明益香港人，而新地就畀人有明燈嘅感覺，佢哋十年一次賣股票，令到大家覺得「跟下都無妨」。
Karen：謝太你真係好樂觀，香港政府，特別係許仕仁應該搵你做代言人。
謝太：代言人？呵、呵，你畀我湊孫湊多幾個月，跟住佢玩走來走去，等我再瘦啲，到時我諗連減肥公司都會叫我去做佢哋嘅代言人！
Karen：咁謝太我預祝你馬到功成先！如果我唔係日日都要睇招股書、業績報告同埋啲公司通告，我都希望可以同你一齊去減肥。
謝太：後生仔女勤力啲都應該嘅，如果你唔勤力，我邊度會有一個咁好嘅broker？Karen，我都知道你今朝仲有好多電話要打畀客，你覺得我今個禮拜應該點？
伯南克難以捉摸
Karen：今個禮拜個市都應該仲會波動好大，我好擔心美國股市會大跌，拖累香港股市。原因係市場對新任嘅聯儲局局長伯南克愈來愈冇信心。上個禮拜我都講過，不過上次我都只係覺得大家對佢嘅蜜月期過咗，𠵱家大家對佢嘅感覺係當佢係一個難以捉摸嘅新老公。有時就話錫晒你唔加息，轉頭就話未加完息「唔好咁快開心」，最大問題就係就連佢都知道市場開始唔信佢，所以大家都驚佢會好似一個完全冇自信心嘅中央行長，要證明保衛美元購買力嘅決心，去過分加息，等啲人唔敢再懷疑佢嘅決心。
謝太：聽落都幾煩，如果美國股市真係再跌，你覺得香港股市會點？
Karen：如果美國股市真係繼續跌，咁港股就一定跌，特別係恒生指數成份股。中行上市，可能會幫到啲大陸公司，不過就會對香港藍籌股冇乜作用。𠵱家最關鍵嘅係究竟恒生指數可唔可以維持喺200日平均收市點數之上，究竟點解咁重要？係因為一個市嘅大勢能否可以保持，可以靠睇呢樣嘢。好似𠵱家大牛市當中，如果恒生指數收市嘅時候係低過對上嗰200日平均收市點數，可能意味牛市結束。仲有，如果愈來愈多世界股市指數都一齊收市係低過對上嗰200日平均收市點數，咁就真係一齊大跌市。
謝太：咁有冇其他主要指數係低過佢對上嗰200日平均收市點數？
Karen：有，就係美國納斯達克指數，標普五百指數亦啱啱跌到附近水位。咁我哋恒指對上嗰200日平均收市點數係大約15500點，我諗有可能今次會跌到15500點，到時先睇下有冇得反彈。所以今次我真係破例咁，希望謝太買啲恒指認沽證做對沖，到時個市真係跌都會冇事。
謝太：其實我都唔捨得賣咗手頭上嘅股票，因為佢哋都係優質嘅公司，所以我鍾意你個提議，Karen幫我落盤買啦。
Karen：ThankYou謝太。