繼早前滙豐大班鄭海泉同黎明喺公益金私人晚宴高唱一曲《那有一天不想你》，噚日公益金一年一度電視籌款盛會《萬眾同心公益金》，亦有好多城中政經界名人參加，大解善囊。
作為公益金執委會主席嘅恒生大班柯清輝亦親自上台，同大會司儀沈殿霞一齊合唱咗首閔南話《愛拼才會贏》，直情反映晒柯大班嘅辦事作風。
其實柯清輝為咗唱呢首歌，經已練咗一段時間，好似早前恒生同班記者卡拉OK，已經唱過。
高歌之後，李東海即刻捐咗一百萬畀公益金，並由公益金會長特首夫人曾鮑笑薇接收。
曾太一行出鏡頭前，八方就俾佢條珍珠頸鏈吸引住，因為啲珠粒粒都好鬼大粒，唔怪得搶晒鏡啦，唔知係咪煲呔今年送嘅結婚周年紀念禮物？
傳真︰2623-9278
電郵︰[email protected]