《達文西密碼》hit成咁，無論你有冇睇過本書，抑或係咪教徒，都要睇吓齣戲至有話題。好似民主黨「真兄弟」內訌事件入面嘅「高達主席」李永達都唔執輸，前晚黃昏就同太太阿tree拍住拖去奧海城睇湯漢斯，兩個人坐住A1同A2，親親密密咁過咗150分鐘。
「本書好睇過套戲呀」
雖然高達唔係天主教徒，但係佢讀聖保羅中學時，就曾經修過聖經，會考仲要攞A㖭，即係個底都唔弱得去邊啦；加上喺上年、即係本書大熱嗰陣，高達已經即時先睹為快，完全知道個古仔講乜東東，所以完全跟到齣戲嘅脈絡，唔似田少咁，睇完都話唔明咁渣，呢勻高達都真係叻過田少噃！
雖然知道套戲噏乜，但唔等於高達畀套戲100分囉。高達話整體嚟講，覺得套戲都OK，不過都係同坊間意見一樣：本書好睇過套戲呀。高達更嫌個結局太直接喇，覺得以一套成功嘅戲嚟講，係唔應該畫公仔畫出腸咁冇懸疑性，反而留有多啲思想空間畀觀眾仲有神秘感。
至於個結局究竟係點，八方梗係唔可以喺度同大家講，以免未睇嘅讀者會媽媽聲。
呢邊有人湊熱鬧去睇戲，以免同人傾偈冇話題，但嗰邊廂嘅Alan梁家傑就唔係太有興趣喇。佢自己話，查實都好耐好耐冇入戲院睇戲，啲戲癮都時不時發作。但如果畀佢揀，佢呢段時間會揀由靚佬湯做嘅《M:i:III》（職業特工隊III）多啲，因為好似會刺激啲，反而對達文西冇乜興趣，好唔熱衷咁噃。
肥仔明變「狒狒」激親
唔知係因為佢唔係天主教徒吖、定係佢鍾意靚佬湯多過湯漢斯，先有呢個選擇？定抑或大狀黨要與別不同，唔鍾意人睇我又睇，咁冇性格之故呢？
講番真兄弟事件，原來仲有下文，喺咁嘅風頭火勢，竟然有人唔怕死繼續寫，而且有啲本來冇上榜嘅人，都俾人拉埋落水，好似肥仔李華明咁，仲俾人改咗「狒狒」做代號，激到佢紮紮跳，肥仔明話講乜都算喇，但梗係唔好改個咁鬼死核突嘅花名啦。
傳真︰2623-9278
電郵︰[email protected]