當年張兆輝在無綫從番薯碌葛捱起，逐漸攀上一線小生之位，惜其後遭投閒置散坐多過做，更淪為站在當紮新人林峯身後當人肉布景版，令張兆輝心淡得與無綫解約，豈料離巢後遇上伯樂杜琪峯，讓他重生，還獲金馬及金像獎「最佳男配角」提名，演技毋庸置疑。 採訪：朱倬誼
張兆輝將人生中寶貴的19年獻給無綫，這19年的故事，說出來有血有淚、有苦有樂。82年，輝仔由藝員訓練班畢業，86年開始躍升小生之位，最令人印象深刻是同年與多位當紮藝人包括劉嘉玲、戚美珍等拍攝長篇劇《黃金十年》，95年播出由他和羅嘉良主演的黃土劇《情濃大地》，收視高企，輝仔篤定上位，惜接下來忽然被安排拍攝電視電影，人氣下降，劇集又愈拍愈少。01年輝仔做到冇癮，決定劈炮。
武夷山上 人面全非
這天，輝仔到中環拍照後細說娘家當年今日，他說：「我01年同TVB解約，咁啱我太太做生意，個天對我好好，至會有咁嘅安排。嗰時我同TVB簽兩年四部，一年拍40集，唔會畀我over，我有氣有力㗎，但畀我喺度漚。拍完《倚天屠龍記》之後，坐咗半年，成日叫我做旅遊特輯，一去就20幾日，久唔久玩吓就好啫，我唔識演戲咩？00年拍旅遊特輯，最後一日去武夷山，我95年拍《聊齋》（當時還擔演主角）又係去武夷山，真係好似拍嘢咁，又係望住呢條河，但就『攤屍』等緊埋位。」
常說現實永遠是殘酷，輝仔想也不想便接口說：「係好殘酷，知道係咁，但未使咁快啩？我自豪一樣嘢就係完全冇後台，全靠我勤力，所以好珍惜。以前出嚟真係番薯碌葛，從中學嘢，呢啲係閱歷，自己儲番嚟。我冇唔滿意TVB㗎，始終好多嘢係佢畀我嘅！」02年拍攝最後一部劇集《雲海玉弓緣》時，輝仔幾乎拍的都是群戲，或站在當時得令的男主角林峯身後，無從發揮，輝仔不諱言：「企喺度做乜呢？冇嘢做嘅？」
輝仔離巢後，獲伯樂杜琪峯賞識，參演對方執導電影《大隻佬》即獲好評，成其愛將，演出多齣阿杜的電影。
如今輝仔以局外人身份看無綫，又是另一番感受：「我冇睇TVB嘅劇，唔係離開咗唔睇，係啲劇唔好睇，幾十年冇變。」
漏口師爺 定位清晰
近年無綫水準較好的劇幾乎一年只得一部，輝仔說：「以前都有幾集戲肉，𠵱家唔知想講乜，因為好多好嘅導演走咗。不過TVB有慣性收視，試吓有線唔收錢，睇吓無綫有冇人睇？起碼少100萬呀！人唔係盲㗎，識睇嘢，只不過冇得揀。𠵱家冇電視明星，邊有人啫？黃宗澤演《阿旺新傳》算幾精靈，係有heart（心）演，吳卓羲未夠經驗，好浮浮游游，佢好似黃子揚（前無綫藝員，擅演歹角）。」
現在的輝仔樂做電影綠葉，正如在《黑社會》飾演漏口的「師爺蘇」，戲不多，但會令人記得。輝仔笑說：「成日會聽到前輩講，要知自己係乜嘢位置，拍完《大隻佬》之後，有人問我點解海報冇我個名？唔重要喎，做乜要為呢啲唔開心，仲好啦，冇壓力，又過到戲癮，最緊要自然，有咪做囉，仲唔需要顧慮咁多㖭！」
