一次又一次的狂躁症發作，毀了洪朝豐辛苦建立的人際關係和公眾形象，甚至失掉工作機會，現在他除家人外，已一無所有。被人取笑癲癲狂狂，背後指指點點，洪朝豐心是痛的，是酸的。回首過去，洪朝豐後悔當初不聽從醫生指示定時服藥，現在痛定思痛，重新振作，希望外界能給他支持和鼓勵，讓他好好再活一次。 撰文：戴彩煥
洪朝豐親自填寫歌詞的新歌《狂風掃落葉》，當中「人就如一陣風，掃落葉，回望人生，多麼可笑；讓途人笑我癡，任沿途滿風雪，問誰人能為我，解開心結……」正正是他現在的心聲。46歲的洪朝豐，是香港中文大學社會科學學士、香港大學音樂系、演藝學院聲樂系的高材生及昔日的電台紅DJ，本是才華橫溢，有着美好前途，但一次又一次的狂躁症病發，已令外界認定他為癲狂一族、生人勿近。縱使他有高人一等的學歷及資深的工作經驗，各大小機構也把他拒諸門外，失去朋友及失掉工作機會的他，除家人外，已是一無所有。
回首過往，洪朝豐無限感慨：「七年病發兩次，對自己殺傷力唔細，破壞晒所有人際關係，破壞晒自己嘅公眾形象，望番轉頭，乜都冇晒。呢個社會嘅人笑緊我時，自己個心係痛，係酸。啲人話我儍話我癲，喺我背後指指點點，冇乜諗過我嘅心情，自問過往都做過唔少善事好事吖！以前好多人願意同我交朋友，到我病發，就好似狂風掃落葉咁，將所有嘢打爛晒。過去發生咗好多事，自己睇番轉頭，好大感觸，眼中有淚，以前愛過我嘅人，願唔願意再愛我，再接受番我？」攀上不准掉頭的指示牌給記者拍照、被紅燈阻止前進的他，正等待重回正軌。
家族遺傳情緒病
洪朝豐表示，世人對狂躁症有太多誤解，兩極性抑鬱狂躁症其實是兩種病交替發作，患者往往怕見人，不想跟外界接觸，更嚴重的，是當事人根本不知道自己病發，病情逐點逐點加重亦毫不察覺。洪朝豐說：「人哋愈係話你病，你愈唔相信，你估我好想病發？我都唔想，我呢個病其實係家族遺傳，我喺泰國嘅堂阿哥都有呢個病。」
本來，只要按醫生指示長期服藥，抑鬱狂躁症是可以根治，但洪朝豐卻對服藥十分抗拒，以為自己病情稍為好轉，便停止服藥，結果病情一發不可收拾。
有傳他是因為服藥後產生副作用而性無能，故停止服藥，但洪朝豐失笑說：「好無稽！我唔食藥有好多原因，其中一個原因，係食藥等同病人，我唔想成日做病人，所以唔食；第二個原因，係醫治呢個病要同時食三種藥配合，第一種藥係抗抑鬱，提升你嘅精神；第二種係抗亢奮，食咗之後令你肥腫不分；第三種鋰劑，係平衡情緒，副作用係會令你手震。食藥之後，有段時間我覺得自己好似機械人，心情冇起冇落，有時又覺得生同死冇乜分別，對萬事萬物冇晒興趣。
「後來我去美國電台做嘢帶少咗其中一隻藥，覺得食少一隻好似冇乜分別，於是就放膽唔食。結果，舊年五月抑鬱症病發，到十二月就輪到狂躁症病發。雖然病發時自己完全唔知，但呢個病嘅癥狀係好鍾意使錢，外語能力強，思路好清晰，好有創作能力，成個人好high。」
長期食藥當食糖
痛定思痛，洪朝豐決定依循醫生吩咐定時服藥，他說：「我諗通咗，呢個病殺傷力太大，既然好多病都係要長期食藥先至好，我寧願當糖食好過，只要我長期食番藥，呢個病一定可以根治。」
重新振作的洪朝豐，近日把他患病的心路歷程一一寄語歌曲上，希望社會人士對他這類病患者多點了解、多點體諒，給他機會再活一次。
