有睇開「現場報道」的讀者也知道，波波的影評總是在不適當的時候出現，通常是太遲，間中會太早。有朋友問我到底想點？如果要睇完我寫的影評才去選擇電影就真係等到頸都長，況且我大部份的影評其實根本就沒有評論該部電影，一句起，兩句止。其餘時間發牢騷，大部份牢騷係叫中國政府開放市場，取消合拍政策，直接引進港產片。
冇錯，我波波就係想咁。其實大部份時間，波波不會因為影評的好壞而影響選擇要觀看的電影。更加不希望自己過份主觀的評價會影響上映中的電影票房收入。今個星期要寫的《職業特工隊》就是一個最好的例子。
《職業特工隊》是一部標準荷李活樣辦商業大片，票房上一定沒有問題，你影評怎樣寫也沒有太大關係，任你鬧，隨你踩，也不會有任何影響。波波早在兩星期前已看過了，好睇，抵睇，娛樂性豐富。其餘就沒有甚麼可評，所以一直也沒有提筆寫稿。直至上星期寫了「樣辦戲」一文後，朋友話我同湯告魯斯差不多，當然不是指樣貌上。朋友指出我寫稿上的問題，無論寫哪一部戲，最後也變成投訴中國政府。我才發覺原來我和湯告魯斯真的差不多，演來演去也是演個差不多的角色。
各位讀者見諒，再一篇沒有評論成份的影評出現，真有點擔心「現場報道」變成個「齋吹唔做」的專欄。不過我估唔到原來湯告魯斯同香港都係同一陣線，拍完戲都係大陸唔批准上映。